Kisi ne sach kaha hai " Waqt hamesha ek sa nahi rehta ". Jab insaan khud apni kisi ek baat par nahi reh sakta to time bhi to badalta rehta hai. Agar hum theek se soche to hume mehsoos hoga ki time nahi badal raha hai, hum badal rahe hai. . . Hum badal rahe hai un situations ke sath. Pehle mobile nahi hua karte thay, tab bhi life to chalti hi thi. Aur aaj mobile ko apna liya hai humne. Pehle life itni simple and easy going nahi hua karti thi. Itni sari facilities nahi hua karti thi, aaj kitchen, modular kitchen mein transform ho gaya hai. Landline phone ki jagah tablets and i phones ne le li hai. Letter ki jagah e- mail . Newspaper ki jagah e paper.
Ghar ki jagah flats and villas ne le li hai. Aaj friends se baat karni ho ya milna ho to sab ek hi jagah par mil jate hai like : - facebook, twitter and other social networking sites. Pehle kuch likhna ho to log diary mein likha karte thay, aur aaj blog ne diary ki jagah le li hai, jaise ki abhi main kar rahi hoon.
Pehle market jane ke liye kayi kilometer jakar khareed dari karni padti thi sabzi lana , ghar ka raashan lana. Alag- alag market jana padta tha, aur ab malls mein sab kuch milta hai ke sath sab kuch bikta hai jaise offers bhi start ho gaye hai. Pehle kabadi wala galiyo mein gum-gum kar raddi de do -raddi de do pukara karta tha aur aaj aap ek miss call karo aur wo khud aapke ghar raddi lene aa jayega. Technology mein bhi kayi badlao aaye hai jaise pehle computer aaye phir log laptop ki aur badhe aur ab enki jagah tablet ne le li hai . Pehle radio hua karta tha, phir logo ne tap recorder lana shuru kiya uske baad Cd player, home theater, i pod na jane kitna badlao aa gaye. Aajkal cassette's to jaise gayab hi ho chuki hai.
Agar hum baat kare shadi ki to usme bhi bahut zyada badlao aa gaye hai. Pehle dulha - dulhan milte nahi thay, sab kuch parents ki marzi se hota tha. Aur aaj shadi se pehle ladka-ladki milte hai, baat karte hai, 1-2 saal ek dusre ko samajhte hai aur phir shadi karte hai. Par afsoos itna janane aur samajhne ke baad bhi itne divorce's ho rahe hai, mis understanding badh rahi hai. Wo vishwaas jo hamare mummy- papa ke beech hai, wo nahi hai.
Itne salo mein kitna kuch badal gaya chahe wo technology ho ya hum. Hum badal gaye un situations ke according, un society, friends, family, environment,office ke according . Aaj badle hai kuch karne ke liye, aage badhne ke liye . Par kise wo purani baatein aur yaadein nahi acchi lagti. Sabko simple life chahiye. Jaha koi tension na ho, ghar walo ka sath aur wo sukoon bhara ehsaas ho. Sabko chahiye wahi sadharan sa khana, apna parivaar, chen ki neend, sacche dost, acchi job. Par aaj ki bhagam bhag mein kisi ko aaram nahi hai sab bhag rahe hai, na jane kaha ? unhe bhi nahi pata ki kaha jana hai. Bas duniya bhaga rahi hai aur wo bhag rahe hai.
Aaj sab kuch badal gaya hai. . kuch bhi pehle jaisa nahi hai. Na dil se khushi hoti hai, na chehre par sacchi hassi. Aankho mein jhothe aansu hai kahin, to baaton mein jhoota dilasa. Samajh nahi aata ki sala " kaun apna hai, aur kaun paraya". Bas itna pata hai -"Badal gayi hai duniya, aur badal gaye hai Hum ."